(Madda Oduu ABO/MOA/Waxabajjii 25,2009) Walgahiin miseensota OPDO guyyaa 45f jedhamee guyyoota 33tti xumuramee fi Xoollaayitti geggeeffame kana irratti kan hirmaatan hojjettootni mootummaa miseensa OPDO ta’an gaaffilee jajjaboo akka gaafatan maddeen keenya ifa godhaniiru.
Walgahii kana kan geggeessaa turan dabballoota OPDO wayta ta’an, warri akka Zalaalem Jamaanee fi kanneen biroo Plaazmaan irraa qooda fudhachuun dhaga’ameera. Xumura walgahii miseensota OPDO kana irratti ergamtichi wayyaanee guddaan Minaasee W/Giyoorgis akka argames hubatameera.
Walgahii kana irratti alagaan afaan Oromoo beekus ta’e hin beekne kaayyoo OPDO fudhannaan miseensa OPDO ta’uu akka danda’u, filuu fi filamuufis mirga akka qabu murtii Mallasfaa kanaan dura OPDOtti dabarsan irra deebi’anii akka mirkaneessan barameera.
Rakkinni biyya keenya keessa jiru rakkina mirgaa osoo hin taane, rakkina misoomaa waan ta’eef, nama gaaffii mirgaa gaafatuuf bakka hin kenninaa jechuun dabballootni OPDO olaanoon walgahicha geggeessaa turan waan Mallas faa itti himan miseensota isaaniitti ajaja dabarsuunis dhaga’ameera.
Haa ta’u malee, miseensota OPDO fi hojjettoota mootummaa kan ta’an hirmaattotni walgahii Xoollaayi kun, gaaffilee jajjaboo kaasuun ergamtoota wayyaanee olaanoo akka rifaasisan dhaga’ameera.
Oromiyaan kan bulaa jirtu Oromootaan osoo hin taane Tigrootaani; kun maaliif ta’a jechuun wayta gaafatan, Goojjamtichi ergamaa wayyaanee ta’e Zalaalem Jamaanee karaa Plaaazmaan deebii kenneen, OPDO kan dhaabe, kan leenjisee fi qabsoo barsiise TPLF waan ta’eef, isaan malee socho’uu hin dandeenyu; waan nuti gochaafii jirru itti xiqqaatayyuu jechuun dhugaa jiru yeroo dubbatu dhaga’ameera. Kana malees hirmaattotni kun Oromiyaan akka qabeenya qabduutti dhimma itti ba’aa akka hin jirres ifa godhaniiru.
MOA
